बाबा आज तुम्ही असायला हवात

बाबासाहेब आज तुम्ही असायला हवात
बाबासाहेब आज तुम्ही असायला हवात ,
हे पहायला कि, तुमच्या लेकरांनी तुमचा धंदा केलाय
तुमच्या कार्याचा विचारांचा चेंदामेंदा केलाय 

तुमचे पुतळे नाक्यानाक्यावर उभे राहिलेत
तसबीरी लक्ष्मी गणपतीच्या बाजूला टांगू राहिलेत
गणपती पूजताना तुमचं लेकरू तुमालाबी ओवाळतय
निळा टीळा लावून जयभीम म्हणत दर शनिवारी हनुमानावर तेल ओततय
जयंतीला "माझा भीम मोटारीत बसलाय” म्हणत 

तुमालाचं डोक्यावर घेऊन नाचतय,

बाबासाहेब, खरच तुम्ही आज असायला हवात
हे पहायला कि, तुमच्या लेकरांनी तुमचा धंदा केलाय
तुमच्या कार्याचा विचारांचा चेंदामेंदा केलाय

तुम्हाला अभिप्रेत असलेला बुध्द अजून आम्हाला नाही भेटला 
तुमच्यानंतर प्रत्येकाने बाबासाहेब होऊन आपापला बुध्द फेकला 
तुमचा भक्त बुद्धपूजा घालत विहाराला बुध्द मंदिर म्हणतोय
बंद डोळ्यांच्या दगडमातीच्या बुध्दाला हात जोडून नवस मागतोय
तुमचा प्रगतीचा रथ मागे ढकलतोय
बाबासाहेब खरच तुम्ही आज असायला हवात
हे पहायला कि, तुमच्या लेकरांनी तुमचा धंदा केलाय
तुमच्या कार्याचा विचारांचा चेंदामेंदा केलाय

तुमचं लेकरू दादागिरी करत सरकारी ऑफिसच्या दारात तुमच्या तसबिरी लागतंय

अन त्या समोर पाट मांडून सत्यनारायण मांडतय

6 डिसेंबर ला खंडणी गोळा करून चैत्यभूमीवर दिवसरात्र चहाबिस्कीट जेवण वाटतंय

दुसऱ्या दिवशी बेकारीच्या ढुंगणावर “कमवायची अक्कल नाय” ऐकत बापाच्या लाथा खातय
रात्री तीच बेकारी घश्याखाली ओतून बापालाच “आई झवाड्या” शिवी घालतंय.

बाबासाहेब खरच तुम्ही आज असायला हवात
हे पहायला कि, तुमच्या लेकरांनी तुमचा धंदा केलाय
तुमच्या कार्याचा आणि विचारांचा चेंदामेंदा केलाय 

तुमच्या लेकरांनी बाजारात कापलाय तुम्हाला
वाटया वाट्याने पक्षाच्या दारावर विकलाय तुम्हाला

मोबदला म्हणून कोण महामंडळ घेतय, 

तर कोण बुडाखाली लाल दिवा घेतंय           

वामन तुमच्या लेकीकडे चावट नजरेनं बघतोय 
अन तुमचं लेकरू त्याच्याच मांडीवर जाऊन बसतय
पुन्हा गळ्यात मडकं कमरेला झाडू बांधण्याची तयारी करतंय 

बाबासाहेब खरच तुम्ही आज असायला हवात
हे पहायला कि, तुमच्या लेकरांनी तुमचा धंदा केलाय
तुमच्या कार्याचा विचारांचा चेंदामेंदा केलाय


प्रमोद शिंदे